جتني تشيل الموت بعيونها شيل = وآشيب حالي إيه وآشيب حالي
أم العيون الناعسات المظاليل = تذبح بها وتقتل أبد ماتبالي
كن المنايا في عيونه مقاييل = بين الرموش اللي هدبها ظلالي
لا سلهمت تفتن زحول ورياجيل = حتى الحريم ايصير فيها اختلالي
ونوارتينه كهرمانة عزازيل = تعكس شعاع الشمس عند الزوالي
واثنيواته كالرهاف الصواقيل = في كف ابن شداد وإلاّ الهلالي
وانهوده اللي مزّعاً جيبها حيل = فرعٍ ليا من الهوى مال مالي
معسول جمّه لعنبو حيّها نيل = أعذب من المي القراح الزلالي
في ذمتي يوم أقبلت كنّه الخيل = إتنقّض المرجود جنب وشمالي
ياعونة الله والخصال المعاسيل = شهد الخلايا ساح منها وسالي
من نعم وجنتها تخاف المناديل = تجرح بملمسها حسين الدلالي
من حلو مطلاعه تشب القناديل = وتنور على ضوح الفنار الليالي
ماتاصفه أبيات شعر وتماثيل = لو حاول الشاعر وحاول محالي
من يوم قفت عسعس الهم والليل = وعجزت لا نسى صورته في خيالي
هي قبلة الديرة وهي شمعة الجيل = سبحان خالقها عظيم الجلالي