الخير

[سعد الحميداني]

انأ أخيل نو ٍ من شمال الحمــى ضــوى = بعيد ٍ ولكن بيّــنت با لسماء رســومه
عراكيــــز برقه حـــولت ليـــلنا ضــوى = وكـــل ٍ فرح في طــــلت الخير وقدومه
رعوده تقــــل ضلع ٍ من العالــيه هـوى = رزيمه يصحّي غــارق النـوم من نومه
تشرفـــت في حزم ٍ مــلاذ ٍ لمــن غــوى = يعــيش بسكون الـــلــيل ويغازل نجومه
أبااعانق الغربي وابا اسهــر مـع النوى = وابتــرك عـشيـــق النوم يقـتات بحلومه
ياحي المطــر ريحه يجــيني مــع الهوى = تلــقيته بنفسٍ من الضـيــق مكتــومه
عسى الله يعـين اللي على الصبر ماقوى= وروحــه من الأشـــواق والبعـد معدومه
أصارع ردى حضن على عمري اللتوى = تــقـول ان نـــــفــسي بالغـرابيل محتومه
انا ياهـــل المعـــروف طــاويني الجـوى = عـلى شـوف حي ٍ مـاعــد تجيــني علومه
قضــابي غرامه واثـر بـــراسي الخـوى = ياعــزي لمــن نفسه مــن الحـب مظلومه
رويــته غــلاي وخـــافــقـي منه ماروى = مــتى اجـوّده بـــيـدي واكــنّ مشــمــومه
مشينا طريق الحب انا وصــاحبي سوى = ولاهــمنـــى الـلي بالقـــــفا مـكثــر ٍ لومه
انا كــل مايس منه تـــاخــذني ارهـــوى = عــلى شــوفهٍ من والي العــرش مقسومه
تراحيــب يا نوٍ شمـــال الحمـــى ضــوى = اعــرفه ولا يجهــلـني الخـــيــر ورسومه

[محمد العريدي]

انا ياهل المعروف طاوينـي الجـوى
على شوف حي ٍ ماعد تجيني علومـه
قضابي غرامه واثر براسـي الخـوى
ياعزي لمن نفسه من الحب مظلومـه

\
/

سعد حيّاك الله يالغالي .. و مرحبا فيييك مليوون

لا جديد الأ التميّز بالحضور .. رغم إنك تبطي علينا :)

صح لسانك يابعدي لين ترضى ولاهنت

[فيصل الهاملي]

ياهلا والله بالحضور .. حي الله ابو يوسف منور الديوان
وصح السانك دوم على الدرر اللي تتميز بها

دمت جميلاً.

[طارق الساعي]

الشاعر سعد ،،

قصيده طرب لها القلب وابتسمت لها الروح وانشرح لها الصدر

لله درك

حبكت الابيات وتسلمت زمام القافيه وابدعت في رسم هذه اللوحه

أبااعانـق الغربـي وابـا اسهـر مـع الـنـوى
وابـتـرك عشـيـق الـنــوم يـقـتـات بحـلـومـه

اخخخ اصبتنا في مقتل ،،


ملاحظه بسيطه اذا سمحت لي استاذي
تقول:
يـاحـي المطرريـحـه يجـيـنـي مـــع الـهــوى
تلقيـتـه بـصــدر ٍ مـــن الـضـيـق مكـتـومـه

استغرب كيف تقول الصدر مكتومه ؟

او انه في معنى اخر تقصده ،، ؟

شاعر متألق في كل احوالك

تحياتي لك..

[مقرن بن زقيع]

الحميداني صح لسانك

واشكر طارق على تنويهه

الشطر الثاني اللي اشار له طارق الوقفه جت على مكتومه وهي مانث والصدر مذكر

لذلك الربط جا فيه مشكله

وهذا مايعيب بس مجرد تنويه


صح لسانك يالحميداني مره

تحيتي لك

[نواف بن فهيد]

سعد صح السانك لين ترضى

نص جميل ورائع


واشكر الاخوان على الملاحظات ,,


تحيتي

[ممدوح القطيان]

صح لسااااانك اخوي سعد

[سعد الحميداني]

أخي محمد العريدي الف شكر على الرد تقبل تحياتي

[سعد الحميداني]

أخوي طارق الساعي

ياهلا وغلا

والساعة المباركة وحضورك شرفني

والف شكر على الملاحظة التي أعتز فيها وبالفعل الكلمة نفس ٍ وليس صدر ٍ وقع الخطاء أثناء الكتابة وعندما انتبهت لها المنتدى لايقبل التعديل وقد أرسلت من قبل لأخي أبو يزيد بالتعديل لكن يبدو أنه مشغول
المهم تسلم ولك التحية والشكر وياهلا

[محمد العريدي]

وبالفعل الكلمة نفس ٍ وليس صدر ٍ وقع الخطاء أثناء الكتابة

تم التعديل بـ واسطتي